mo22 مجلة للرجال على الانترنت موجهة إلى الرجل العربي
” استرجل واشرب تمر هندي ” ، شوفنا اعلانات مشروب شعير مشهور بيطلب مننا اننا نسترجل و نشرب هذا المشروب يعني لو مشربناش المشروب ده هنبقي ايه ؟
انا بقي هشرب تمر هندي
كنت قاعد بتفرج علي التلفزيون مع الزوجة و جه اعلان مشروب الشعير بتاع استرجل و اشرب مش عارف ايه استغربت جدا بجد و استأت من الاعلان ده بعد ما انتهي الاعلان و جدت مراتي تبصلي بصة غريبة كأنها عاوزة تلمح بشيء في داخلها قلتلها بصوت خشن قومي يا ولية هاتيلي تمر هندي فطلعلي شارب كبير فقالتلي متقوم انت فحرقتني رجولتي و عدم سمعان كلامي و عدم طاعتي و لا ينفع ان اسكت فقمت اجيب تمر هندي اشربه اهدي بيه اعصابي.
هما شايفين الرجولة معدومة ؟
انا مش عارف هما شايفين الرجولة و النخوة و الخشونة معدومة عندنا عشان يعملوا اعلان بالشكل ده ولا ايه انا مش فاهم ما انتو شفتوا انا مسيطر ازاي عندي في البيت , الغريب ان كل الشباب عاجبهم الاعلان بشكل غريب مع انه عيب في حقنا اوي مع انه كوميدي لكن الاعلان ده غلط فينا و في رجولتنا.
دي فكرة للسيطرة علي العالم
و الله عندي احساس كبير ان صاحب فكرة الاعلان دي واحدة عشان كل يوم تهزقنا كدة بالشكل الغريب ده لأ و احنا نضحك هي دي خطط الستات و المؤامرة علينا عشان يحبطونا و يقوموا بالسيطرة علي العالم و ياخدوا مكاننا لكن احنا مش هنسكت.
اتمايسي و خليكي هايدي
دعوة لكل الرجالة بتوعنا تبرعوا عشان نعمل اعلان اتمايسي و خليكي هايدي لأن البنات كلهم في الأونة الاخيرة ملاحظين انهم استخشنوا و استرجلوا شوية هنعمل اعلان انتوا مش احسن مننا يعني عادي جدا و لكن بردو في بنات زي الفل و في رجالة زي الفل و مش لازم نمسك يعني اوي في الاعلان عشان محدش يجي يقولي ا نا فاضي انا بس بلفت نظر بس بردو هعمل الاعلان اللي قولت عليه ده.
و يبقي الحال كما هو عليه و بردو هشرب تمرهندي
