مجنون ترانزيت

يا كترة المجانين في عصرنا ده و يا قلة العاقلين في عصرنا , اول مرة اشوف مجنون يشدني و اتشد اني اعرف قصته المجنون ده حد زيه زيك بس يا تري ايه اللي جننه ؟؟

المجانين في نعيم

المجانين في نعيم الجملة دي بنسمعا كتير يعني انت بتحسد المجنون ليه يا عم شايفه لابس بدلة سينيه و راكب بورش و لا شايفه ماشي مع عيلته مبسوط ؟؟ , ده واحد غلبان يأما تايه في الشارع يأما في السرايا الصفرة الحلوة دي اللي في العباسية فلازم تعقلوا الكلام لحسن يتقال عليكوا انتوا المجانين و كفاية بقي زهقتوني ده فعلا المجانين في نعيم.[clear]

انا متراقب

لاحظت في الفترة اللي فاتت اني بلاقي راجل شعره منكوش كدة و شكله غريب بيجي تحت بيتي و يقدع يقول منك لله منك لله .. استغربت قولت عادي يمكن قطة عملتها عليه ولا حاجة مش موضوع اهتم بيه يعني المهم بقيت كل يوم اشوفه و بدأ لما يشوف اي ست يرميها بالطوب و يشتمها بس انا حاسس ان الصوت ده مش غريب عليا بس قولت عادي.[clear]

ليه كدة يا مصيلحي

كنت نايم في يوم سمعت صوت انذار عربية عالي اوي ببص من الشباك لقيت زجاج عربيتي مدشدش و المجنون ده واقف جمب العربية و بيبصلي و بيطلعلي لسانو نزلت جريت وراه عاوز اضربوا لأنه نرفزني الصراحة جراني وراه مصر كلها معرفتش اجيبه لغاية ما نفسي اتقطع روحت البيت مهدود و بعيط علي العربية اللي ادشدشت دي و حكيت لمراتي قالتلي ايه ده انت متعرفوش ؟ قولتلها هو انا هعرف مجانين مش كفاية انتي , قالتلي ده مصيلحي جارنا الراجل بعد ما طلع معاش مبكر من الشركة اللي شغال فيها مبقاش معاه فلوس راحت مراته كانت كاتبة كل حاجة بأسمها و كانت عاوزة تخلص منه راحت كلمتني و قولتلها اعملي عليه خلع و اديه اتخلع و عقله معاه و طردته من الشقة .. يا عيني يا مصلحي.[clear]

اللي زعلني من مصيلحي انه كان بدل ما يرمي الطوبة علي العربية كان رماها علي مرات صاحب العربية … ليه كدة يا مصيلحي